其中寫全漢–ê、抑是寫漢羅濫–ê，差不多攏願意接受 KIP 推薦用字，阮知影伊毋是十全 ê 系統，無夠額 ê 部份，逐家會參詳，看欲按怎來改善。像 Facebook 迷眾頁「失控的台語課」有認真紹介足濟 KIP 詞典無收 ê 字，in 有一个「瀕危詞留聲計畫」，下偌濟lŏe-hi 做，偌工夫–neh，你敢知？in 閣會強調講「阮 ê 字毋是規範用字，逐家罔用」按呢。
Kăng「搤空」、「騷擾」ê 人，蓋成是大衛羊–啦！Hoⁿh？喈喈叫，又閣袂講–得，實在看 kah 足𤺪–ê！伊 hiah 閒–tio̍h，有閒翕影片，呔會無時間寫一寡正經 ê 論文、抑是出版一本字典、抑是成立一間學校？來 kā 阮「教示」–一下，正範 ê 台員字到底是按怎寫–a55？一篇文章也好，寫來予阮來看覓–a33！
對文字 ê 態度
文字 chit 款物件–hohⁿ，本成就是咧替語言服務–ê，也無啥物大道理–啦。
羅馬字無本字 ê 問題，干焦記錄聲音爾爾。Chit 項要求，白話字、台羅字攏做會到。其他 ê 奇奇怪怪 ê 拼音嘛是有–啦，只要有系統，也無啥物大問題–啦。
若講着漢字，鋩角就有夠濟。揣有本字，逐家攏歡喜。揣無本字，語源無確定，欲按怎？就鬥一个仝音 ê 字，抑是鬥一个仝款意思 ê 字，就按呢爾–a55。 教育部漢字徛算講共 99% ê 孤音節語素（monosyllabic lexeme）攏揣有漢字通好用–矣。賰–ê 就是一寡外來語爾。汝講 chit-má 教育部 ê 物件無百分之百正確–oh11 ？是–a33，人嘛無講 in 是絕對標準–ê–a33。人干焦「推薦」爾，人曷無逼你寫–a33！
閣再講，古早人寫 ê 冊，敢着有較正確？敢攏袂脫箠？汝敢有信心，掛保證講：1000 年前 ê 人，逐家攏足有科學精神，逐家攏知影愛去做田野調查，四界行透透，共無仝族群 ê 語言用一个有系統 ê 方法記錄–khiài，而且完全無落勾–去。古早人一下無細膩，字寫毋着–去，序細就綴咧寫毋着–矣–啦。我舉一个例。
台語有一个詞叫做 pò-thâu，專門咧形容春天到熱–人之間 ê 低氣壓所造成 ê 對流雨，風一般嘛足透–ê，英語號做「squall」，華語號做「颮（ㄆㄠˊ）」，電視新聞不時咧講–着。KIP 字典寫做「報頭」，講伊是風暴 ê 前兆，可能是一種「預報」ê 概念，所以叫做「報」頭。毋過潘科元先生考證講，清國時代有人用「𩗗頭」 來寫 pò-thâu，顯示講「pò」可能本身就是一種風 ê 款式。
清國 ê 讀冊人王士禎（漁洋山人）佇《香祖筆記》寫講「臺灣風信與他海殊異，風大而烈者為颶，又甚者為颱」。「颶」chit 字，真有可能是「𩗗」寫毋着–去 ê 結果。王–先生有佇後壁寫註解，講「按升庵先生云颶當作𩗗，音貝」。
“Hei, yūr orþàgrêfi is sou shiti; jū shud rait ðê wei ai dū!” (Hey, your orthography is so shi*ty; you should write the way I do!) 「Eh，恁 ê 正字法是啥 s*âu–啦？恁應該照我按呢寫！」
𪜶會接受–袂？無可能–啦！
𪜶凡勢會講「Okay，cool，毋過阮祖先就是按呢寫，阮都無意見–矣，你是改 he 欲死–hioh？」
而且美國人、英國人 ê 發音閣無啥仝，cough 有的人唸 /kɔf/，有的人唸 /kʌf/，若叫𪜶改革正字法，𪜶可能會先相諍。
非母語者，親像德國人、印度人、巴西人、坦宋領（Tanzania）人，嘛攏袂接受新 ê 正字法。𪜶會講「袂䆀是袂䆀–啦……阿，是按怎阮愛聽你–ê，你 ê 母語 a̍h 毋是英語–a33！」
Eh，小等–咧，淮南佇 taih 你敢知？安徽–neh33！凡勢你講，「淮南」無的確是現此時安徽省 ê 淮南市，好–啦。毋過小可仔有語言學智識 ê 人都知影講，語言是不時咧變化–ê，有地理分佈 ê 精差，嘛有歷時 ê 變化。凊彩一个中國南方 ê 古早人咧講 ê 話，hām 阮現代 ê 台員話相𫝛，所以著愛用仝一字？聽你咧腫頷–咧！
我今年有買洪惟仁教授新出版 ê 中國《閩南地區方言地圖集》，伊毋是坐佇研究室掀字典–呢，𪜶 ê 團隊是開十迵年 ê 時間，實際走去中國幾十个方言點做調查。調查甲 chiah 徹底，實在予人足佩服–ê。共時 ê 變化都已經足驚–人–矣，歷時 ê 變化是欲研究 kah 底時？ 𪜶咧重建（construct）原始閩南語 ê 時陣，嘛是照步來。無學理基礎–ê ，𪜶毋敢亂講。啥物是學理基礎？任何語音 ê 變異，攏有伊 ê 動機。閩南語 ê 央元音就是因為「有標」（marked），僫發音，chŏaⁿ 漸漸落勾–去。
大衛羊，你嘛小解說一下，是按怎「於脂切」ê「蛜」雄雄佇台語出現鼻化元音，是按怎蛜會有「eⁿ、iⁿ」chit 組腔口差？漢語族 ê 語音變化敢有 chit 種規則？
阿「䗧蛜」 ê 「䗧」又閣是走佗位–去–矣，haⁿh？抑是講你欲硬拗，講「䗧蛜」伊就飛 á 飛，一下飛上天，一下盤山過嶺，迒過大海，來到Formosa，雄雄感覺忝–矣，好歇睏–矣，就歇佇田–裡，翼股展開開，化身做「田蛜」？
閣再講，「田」chit 字䢢拄䢢就毋是本字–呢！「田」佮「chhân」其實無直接 ê 語源、語音 ê 關係，是借伊 ê 意思提來鬥–ê！。《廣韻》：「田，徒年切」，屬山攝、四等、開口、定母，劉建仁先生講，che 佇台語無可能讀做「chhân」。
大衛羊遐 ê「漢字仙」，就是對語言 ê 「毛」傷過綿精–矣。文字 ê 重點是為語言服務–ê，是咧方便語言 ê 傳達、記錄、保存–ê。文字本身毋是目的。
我閣餾一改：「漢字若好用，阮就會寫，若無歹用，阮就 boaih 寫。一切據在阮 ê 需求！」若刁工欲舞一个漢字系統，要求伊 ê 「形、音、義」 佮古典漢文有對應，而且對甲峇峇峇，按呢實在是咧做戇工！
Heⁿh–啦。我承認是實用性 ê 問題原仔是語言存亡 ê 關鍵。
你看網路上資訊量上蓋大港 ê 語言英語、法語、西班牙語、華語，逐仝攏有幾若億 ê 人 kō͘ chia-ê 語言咧生產資訊、傳播資訊，啥物資訊？新聞稿咧寫–ê，流行歌咧唱–ê，網路劇咧搬–ê，手機仔掰來掰去–ê，佇 –ê，四界攏是！
莫講台灣 2300 萬人，咱 chit-má 若去揣 10 萬个十二生相 ê 民眾，有做獨立樂團–ê，有駛戰車–ê，有做網路行銷–ê，有做法律顧問–ê，有買賣密箍銀–ê，有設計手機仔晶片–ê，按呢我欲問：捒台語文 ê 朋友敢準備好，予10 萬个（可能嘛欠缺台語文智識 ê ）人講台語來生活、來食頭路、來育飼囡仔，攏毋免透濫一句華語？台語 ê 詞彙敢接載會牢？
A blue-sky wanderer 